Til varnar Ísrael

Það er átakanlegt að fylgjast með fréttum frá Gasa og Ísrael þessa dagana þar sem saklausum fórnarlömbum ofbeldis og öfgahyggju fjölgar með degi hverjum. Myndir af særðum og látnum berast heim í stofur fólks um allan heim. Fólk er forviða, hneykslað og fyllist reiði og spyr hvernig Ísraelsmenn, sem ekki hafa farið varhluta af ofsóknum í gegnum tíðina, geta staðið fyrir árásum sem hafa slíkar hörmungar í för með sér fyrir saklaust fólk.

Af þessum sökum eru æði margir reiðubúnir til að fordæma Ísrael, krefjast viðskiptaþvingana og að stjórnmálasamskiptum við Ísrael skuli slitið til að knýja Ísraelsmenn til að hætta árásum á Gasa. Þótt þær tilfinningar sem búa að baki slíkum kröfum séu skiljanlegar verður að hafa í huga hvaða afleiðingar slík fordæming og einhliða kröfugerð hefur. Í raun getur slíkt lagt líf enn fleiri saklausra borgara hættu - bæði á Gasa og í Ísrael - enda gengur baráttuaðferð Hamas einmitt út á að stuðla að og nýta sér dauða almennra borgara og hörmungar þeirra. 

CNN strategían 

Hamas-liðar kalla þessa ógeðfelldu aðferð sína "CNN aðferðina" og setur hún Ísraelsmenn í óhemju erfiða og flókna stöðu sem lýsa má sem siðferðilegu öngstræti enda ekki óeðlilegt að gera meiri siðferðislegar kröfur til Ísraelsmanna en til Hamas.

CNN aðferð Hamas gengur út á að skjóta flugskeytum frá borgaralegum svæðum á Gasa (leikskólum, skólum, sjúkrahúsum, íbúðarsvæðum o.s.frv.) á borgaraleg svæði í Ísrael og ögra þannig Ísraelsmönum til að taka til varna og svara árásunum. Í stað þess að byggja neðanjarðarbirgi til að forða Palestínskum almenningi frá gagnárásum Ísraelsmanna stuðla Hamas liðar að því með aðgerðum sínum eða aðgerðarleysi að sem flestir almennir Palestínumenn verði fyrir sprengjum Ísraelsmanna og sjá til þess að myndir náist af blóðugum fórnarlömbum og að slíkar myndir berist heim í stofu í þeim tilgangi að vekja viðbrögð fólks. Tvöfaldur glæpur Hamas felst í því að fela sig og árásarvopn sín á bak við óbreytta borgara og vísvitandi beina vopnum sínum að óbreyttum borgurum. Til að bæta gráu ofan á svart hefur Hamas sett upp sprengjugildrur á Gasa m.a. í skólum til að auka enn á mannfall saklausra borgara (eins og m.a. er sýnt fram á í þessu myndskeiði) en mjög sjaldan er greint frá þessum hlutum í fjölmiðlum og litar það vissulega afstöðu fólks.  

Þessi djöfullega strategía Hamas virkar og viðbrögðin láta ekki á sér standa. Í stað þess að varpa ábyrgðinni á Hamas eru viðbrögðin mótmæli og fordæming á aðgerðum Ísraels - viðbrögð sem eru til þess fallin gera Hamas kleift að halda áfram - af fullkomnu skeytingarleysi fyrir lífi saklausra einstaklinga - að fylgja eftir markmiði sínu um eyðingu Ísraelsríkis og ná á sitt vald öllu landsvæði frá Jórdan til Miðjarðarhafs.

(Hamas hefur reyndar tekið út markmið um "eyðingu Ísraels" úr samþykktum sínum og heldur því gjarnan fram í vestrænum fjölmiðlum að krafan þeirra sé að horfið verði aftur til landamæraskipan frá 1967 en eins og fram kemur í þessum og öðrum viðtölum við Hamas er markmiðið enn landið allt sem skilur ekki eftir pláss fyrir Ísrael.)

Hér að neðan er myndband sem sýnir hvernig Hamas lætur sér ekki nægja að skjóta eldflaugum í skjóli almennra borgara heldur smalar saman fólki til að mynda "mannlegan skjöld" utan um hús sem þeir nota í hernaðarlegum tilgangi eftir að  Ísraelsmenn hafa varað íbúa við að yfirvofandi sé árás á húsið (til að forðast fall almennra borgara).

Ísraelsk yfirvöld hafa m.a. gefið út þessa skýrslu til að lýsa því sem þeir kalla "Hamas Exploitation of Civilians as Human Shields". Og Hamas lýsa því stoltir að dauði sé orðinn að iðnaði hjá Palestínumönnum!

Markmið Hamas 

Margvíslegar heimildir eru til sem lýsa hugmyndafræði, markmiðum og starfsaðferðum Hamas sem því miður benda til að engar líkur séu til þess að samtökin séu tilbúin í varanlegan frið við Ísrael. Þeir sem hafa áhuga á að kynna sér þessi mál geta leitað sér heimilda á netinu. Gagnleg fréttaveita um málefni Miðausturlanda er MEMRI (The Middle East Media Research Institute) sem safnar og þýðir á ensku sjónvarpsefni frá þessum heimsluta.

Meðal efnis sem þar er að finna er viðtal við Mus'ab Hassan Yousef, sem er sonur eins af stofnendum Hamas (Sheik Hassan Yousef sem er leiðtogi Hamas á Vesturbakkanum). Yousef sem í dag hefur snúið baki við Hamas og föður sínum (og tekið kristna trú) veitir fágæta innsýn inn í heim Hamas. Í viðtalinu, sem sýnt var í kýpversku sjónvarpi í ágúst 2008, lýsir hann m.a. upplifun sinni af því að dvelja í ísraelsku fangelsi fyrir Palestínumenn þar sem Hamas kerfisbundið stóð fyrir pyntingum á eigin fólki sem m.a. leiddi til dauða fjölmargra fanga.

Viðtalið er hér að neðan (sjá transcript hér):

Í viðtali við ísraelska dagblaðið Haaretz segir Mus'ab Hassan Yousef jafnframt:

You Jews should be aware: You will never, but never have peace with Hamas. Islam, as the ideology that guides them, will not allow them to achieve a peace agreement with the Jews. They believe that tradition says that the Prophet Mohammed fought against the Jews and that therefore they must continue to fight them to the death.

Ég minni aftur á að þetta segir palestínskur maður sem er alinn upp í íslamskri trú, sonur stofnanda Hamas og ætti því að hafa ágætar forsendur til að halda þessu fram.

Stríðsreglur og "lögmæt" skotmörk

Ljóst að Ísraelsmenn hafa þurft frá stofnun ríkisins þurft að verja sig fyrir árásum frá nágrönnum sínum. Það hafa þeir gert með ýmsum leiðum sem án vafa er hægt að gagnrýna enda ljóst að stríð  fela í sér dauða og hörmungar og bitna iðulega á saklausu fólki. Stríð felur í sér ofbeldi og eru í eðli sínu ógeðsleg en hafa engu að síður fylgt manninum lengi. Í gegnum tíðina hafa verið settar „reglur“ (t.a.m. Haag-sáttmálinn, Genfarsáttmálarnir o.fl.) um hvernig stríð skuli háð (eins fáránlegt og það kann að hljóma). Slíkar reglur kveða á um hvaða vopn má nota, hvaða skotmörk eru "lögmæt" í stríði og fleira. Skólar, bænahús og sjúkrahús eru augljóslega ekki „lögmæt“ skotmörk og því eðlilegt að fólk spyrji sig hvernig standi á því að Ísraelsmenn beini vopnum sínum á þessa staði. Ástæðan er sú að þegar Hamas liðar nota þessa staði til vopnaframleiðslu, sem skotpalla eða í öðrum hernaðarlegum tilgangi í skjóli borgaranna breytast þessir staðir í „lögmæt hernaðarleg skotmörk“! Ábyrgðin á því liggur því augljóslega hjá Hamas.

Varanlegur friður eða "vopnahlé"

Tímabundin vopnahlé eru hluti af taktík Hamas. Ekki sem leið til að leita sátta og finna leið til varanlegs friðar við Ísraelsmenn enda er varanlegur friður ekki hluti af markmiðurm Hamas. Hamasliðar nýta „vopnahlé“ bókstaflega til að ná vopnum sínum sem þeir smygla frá Íran. Íran, sem er bæði hugmyndafræðilegur, fjárhagslegur og hernaðarlegur bakhjarl Hamas, fer nefnilega ekki heldur í felur með að lokatakmark þeirra er eyðing Ísraelsríkis.

Mikilsvert er að fjölmiðlar, almenningur og ráðamenn hugi vel að sér og skoði vandlega eðli og ástæður átakanna fyrir botni Miðjarðarhafs áður en menn kveða upp dóm í þessu mikilsverða máli. Markmiðið verður að vera að þeir sem sannarlega vilja lifa í friði til frambúðar og virða trúfrelsi nágranna sinna sé gert kleift að gera það.

Til þess að það sé hægt verður að ráða niðurlögum þeirra afla sem ekki vilja frið.

Athugasemdir

[Óttar Felix Hauksson, 16.1.2009 kl. 00:42]

Frábær frammstaða Sveinn og mikið hugrekki sem þú sýnir með þessari færslu,  í því andrúmi einhliða fréttamennsku sem viðgengst í íslenskum fjölmiðlum. Fréttamennska sem sýnir best lágkúruna og hjarðmennskuna sem hér viðgengst. Það er aldeilis akkur að hafa svo skelegga talsmenn sem ykkur  Gísla Frey, menn sem sem hafa burði til standa í báðar fætur og gefast ekki upp í hugmyndabaráttunni gegn þessu stórhættulega áróðursgengi sem, undir forystu Sveins Rúnars Haukssonar, elt hafa hugmyndafræði PLO og haldið uppi andstöðunni gegn Ísrael  allar götur síðan tengsl þeirra við Bader-Meinhof glæpaklíkuna í Vestur-þýskalandi urðu ljós, en eins og kunnugt fóru félagar úr Bader-Meinhof í þjálfunarbúðir til PLO í borgarskæruhernaði á árinu 1970.

[Sveinn Hjörtur , 17.1.2009 kl. 00:16]

Sæll nafni, og takk fyrir innlitið.

Ég hef lesið það sem þú skrifar hér og er sammála mörgu. Ég veit vel hvernig Hamas vinnur og misnotar aðstöðu sína með almenna borgara.

Sama má segja með fréttaflutning, og er Gaza svæðið engin undantekning. Þess vegna hef ég gefið mér tíma og fylgst með fréttum frá ýmsum stöðum.

Hitt er það aftur á móti sem ég fordæmi, og það er það sem snertir báða aðila, er þessar grimmdarlegu árásir sem hafa gengið undanfarið. Það er það sem ég fordæmi og kalla á ábyrgð alþjóðasamfélagsins vegna þessa.

Kannski er um að ræða verk sem óvinnandi er? Kannski!

[Gunnar Th. Gunnarsson, 17.1.2009 kl. 00:44]

Vel unninn pistill, takk fyrir þetta Gísli. Þetta er hrikalegt

[Gunnar Th. Gunnarsson, 17.1.2009 kl. 00:47]

Sveinn átti þetta að vera

[Zaraþústra, 17.1.2009 kl. 02:27]

... sagði Alan Dershowitz.

[Jónína Sólborg Þórisdóttir, 17.1.2009 kl. 03:30]

Hlýtur að vera þægilegt að sitja heima í stofu og tala um "báðar hliðar málsins" þegar maður þarf ekki að vera í miðjum átökunum sjálfum og upplifa óhugnaðinn beint í æð (þ.e. þriðju hliðina, alvöru hliðina - ekki "hlið Ísraela" og "hlið Hamas"). Þessi andskotans árátta ykkar stríðspopulistanna er alltaf eins. Þið haldið að þið vitið hvað þið eruð að röfla um en hafið auðvitað aldrei upplifað (og munuð vonandi aldrei upplifa) þann sársauka, hræðslu, hrylling og vanmátt sem fangarnir í fangabúðunum á Gaza eru að upplifa núna. Fangar í eigin landi, lokaðir inni og komast ekki neitt á meðan þeir eru þurrkaðir út af kortinu, bókstaflega og í skjóli fólks eins og ykkar.

Stríð ætti að vera algjör óþarfi á 21. öldinni. Í stað þess að tala um "hliðarnar" ætti fólk að berjast af öllu afli á MÓTI STRÍÐI hvar og hvenær sem það er í stað þess að skipa sér í fylkingar með og á móti. ÞAÐ er þriðja hliðin sem skiptir ÖLLU máli.

[siggi (IP-tala skráð) 17.1.2009 kl. 09:00]

hvernig réttlætirðu eyðileggingu Ísraelsmanna á Lyfjum, mat og öðrum nauðsynjavörum...

Svo ég tali nú ekki um árásir á lyfja og matarflutningalestir frá sameinuðuð þjóðunum?

Hversu mikil þarf innrætingin að vera til þess að maður réttlæti slíkt?

[Björn Heiðdal, 17.1.2009 kl. 09:17]

Eitthvað virðist menn vera illa áttaðir hér á þessari síðu!  Fordæming fólks á morðum Ísraels snýst ekkert um Hamas eða einhverja meinta ást á herra Amadíllajad.  Flest fólk, kannski ekki þið, fær litla gleði út úr morðum á saklausu fólki. 

Annar punktur hjá síðuhöfundi er að stjórnvöld á Gasa byggi ekki neðanjarðarbyrgi handa öllum íbúunum þar.  Það mun vera eitthvað hámark mannvonsku að hafa ekki efni eða kannski vilja til þess.  

Annað rugl í svona málflutningi er sú staðreynd að Palenstínumenn berjast innbyrðist um völd og drepa hvern annan til að ná markmiðum sínum.  Eins og það gefi Ísrael og stjórnvöldum þar frítt spil í fjöldamorðum sínum.

Sveinn T. virðist líka halda að öll börnin sem Ísraelski herinn hefur drepið að undanförnu hafi beðið sæt og prúð í skólanum sínum eftir sprengjuregni Ísraelska hersins.  Á meðan hafi síðan vopnaðir karlmenn skotið eldflaugum út um gluggana á húsnæðinu á Ísraelsk skotmörk.  Ég hugsa að allt skólahald liggi niðri eins og myndbandið sýnir.

[Benedikt (IP-tala skráð) 17.1.2009 kl. 11:09]

Þetta er nú meira bullið í ykkur hérna strákar, pistillinn gengur meðal annars út á það að fréttaflutningur styðji málstað palestinumanna. Nægilegt er að fylgjast einungis með t.d. CNN (sem er í eigu bandarískra peningamanna, studd og lituð af t.d. bandaríkjastjórn, hægrimönnum og gyðingum í bandaríkjunum) til að sjá að ísrael er einfaldlega að myrða saklaust fólk. Það þarf ekki að hlusta á norska lækna, al-jazeera (eða hvað hún heitir), rauða krossinn, sameinuðu þjóðirnar eða jafnvel almenning í ísrael (fyrir utan bókstafstrúarmenn auðvitað) til að mynda sér skoðun, CNN dugar!!! Vissuð þið að þið deilið skoðunum með bókstafstrúarmönnum í ísrael, en EKKI almenningi í ísrael?

[Sveinn Tryggvason, 17.1.2009 kl. 11:51]

Zaraþústra: Já, Alan Dershowitz hefur einmitt gert tilraunir til að koma til skila svipuðum boðskap.

Jónína Sólborg: Það er langt frá því að vera "þægilegt" að sitja heim í stofu og horfa uppá þessar hörmungar. Ekki veit ég hvað fær þig til að uppnefna mig "stríðspopulista" en ég álít það ekki vera málefnalegt og gagnlegt. Hvet þig til að beita rökum. Ég hef andúð á stríði líkt og þú en til að stöðva hatursfulla ofstækismenn þarf því miður stundum að grípa til vopna (sbr. Peacce for our time)

Siggi: Hiðs "siðferðilega öngstræti" felst m.a. í því að konur og börn eru notuð til að smygla vopnum, sjúkrabílar til að flytja stríðsmenn Hamas, og skólar notaðir sem vopnageymslur og eldflaugaskotpallar. Hvernig á að bregðast við slíku? Ísraelar eru ekki hafnir yfir gagnrýni en fullkomið skilningsleysi á aðstæðum þeirra er til óþurftar. 

Björn Heiðdal: Því miður er einmitt málið að fólk fordæmir Ísrael án tillits til Hamas og Íran. Að láta að því liggja að ég fái kannski gleði út úr morðum á saklausu fólki eru ekki rök heldur mjög meiðandi aðdróttanir. Ég biðst undan slíku.

[Ottó Örn (IP-tala skráð) 17.1.2009 kl. 15:31]

Takk fyrir vel unninn pistil Sveinn. Sá besti sem ég hef séð hingað til sem skýrir hlið ísreals.

 Ég ætla að gefa mér það bessa leyfi að segja þeim sem koma með fullyrðingar á borð við "stríðspopulista",  "Flest fólk, kannski ekki þið, fær litla gleði út úr morðum á saklausu fólki." og fleiri í þeim dúr að skammast sín (að fólk skuli voga sér að segja svona, hugsa fyrst tala svo “ekki þetta heiftar staðhæfingar bull!”). Þar sem flestir sem tala svona gera sér ekki grein fyrir að þeir fordæma oft á tíðum bara morðin frá annari hlið. Enginn á að vilja loka augunum, menn eiga að vera ætíð með opið fyrir því hvað er sannleikurinn.

Morð er aldrei réttlætanlegt, en herðnaður er það á tímum (og herðnaði fylgir ÞVÍ MIÐUR oft lát saklausra).

Ætla fá að vera harð orður og segja, enginn heilvita íslendingur gefur það í skyn að menn ræði um viðkomandi herðnaðar mál með ró í hjarta, heima í stofu eins og um nautn sé að ræða. Þann dag sem til herðnarar þarf ekki að grípa fyllast allir með samvisku gleði (því miður þá persónulega sé ég ekki þann dag rísa á þessari jörð á meðan mannkynið gengur hér um).

Aftur ætla ég kannski að fá að taka mér annað bessaleyfið, með því að segja. Þessi pistill var af öllum líkindum ekki skrifaður til neins annars en að draga upp réttmæta hlið Ísraels manna sem er allt of sjaldan ef einhvertímann dreginn upp hér á landi. Einnig til þess að fordæma aðferðir og heift Hamas samtakana (sem allir frið elskendur ættu einnig að gera heilshugar).

 

[Hákon Einar Júlíusson (IP-tala skráð) 17.1.2009 kl. 15:34]

Ég er samála Jónínu, reyndar ætla ég ekki að kalla þig stríðspopulista en ég myndi segja að þú hafir ekki kynnt þér söguna nægilega mikið og hvernig Ísrael varð til, sú þjóð var ekkert 'Lýðræðislega' sett á laggirnar.

Kynntu þér Ísraelsku Rothchild fjölskylduna og Zíonisma sem er stjórnmálaheimspeki Ísraelsmanna þá kannski fattar þú hverju þeir trúa og sérð að það er ekkert skárra en það sem Hamas liðar eru að gera. Spyrðu bara sjálfan þig hvað þú myndir gera ef að þú værir læstur inn í Gazasvæðinu og einn stæðsti f-16 þotufloti í heimi væri að sprengja allt í tætlur og að börnin þín væru að deyja?

Þú sagðir sjálfur:

'Ég hef andúð á stríði líkt og þú en til að stöðva hatursfulla ofstækismenn þarf því miður stundum að grípa til vopna'

Það er nú bara einmitt það sem Hamas liðar eru að gera eftir 60 ára baráttu við fjöldamorð Ísraelsmanna gegn palestínisku þjóðinni, að sjálfsögðu eru aðferðir þeirra ógeðfeldar en ég myndi segja að þetta séu geðsýkislegar, hugsanalausar og örvæntingafullar aðgerðir þeirra til þess að verja sig gegn ofurtæknivæddri heilaþvegnu 'Varnarsveit' Ísraelsmanna.

Maður á ALDREI að taka sér hlið í stríði, fordæming á aðgerðum Ísraelsmanna felst ekkert í því að 'standa með hamas' eða 'standa með Ísrael' Fólk veit það vel að Hamas beitir ógeðslegum aðferðum við hryðjuverkastarfsemi sína en aðgerðir Ísraelsmanna eru milljónfallt verri, þeir eiga bara í fjandanum ekkert að vera að skjóta á skóla, sjúkrahús og leikskóla!!!

Við eigum að fordæma stríð sama í hvaða mynd það birtist...EKKERT ANNAÐ og ef að þú myndir spyrja palestínísku þjóðina hvað hún myndi vilja væri það líklega ekkert annað en að fá frið en það sama gildir ekki um 83 % íbúa Ísraelsmanna vegna Zíonismaheilaþvotts ráðamanna þar í landi.

[Loftur Altice Þorsteinsson, 17.1.2009 kl. 15:55]

Var það þessi utanríkisráðherra, sem vildi taka sæti í Öryggisráðinu ? Skilja menn núna hvers vegna Íslendingar náðu ekki kosningu ?

Ingibjörg hefur sagtst vilja vinna að friði í Mið-austurlöndum. Nú sjá menn svart á hvítu, það sem útlendingar sáu strax, raunar um leið og Imba settist í stólinn. Hún hefur engan áhuga á friði. Hún hefur bara áhuga að styðja Mújahidana.

Þeir sem vilja stuðla að friði, ræða við deiluaðila. Þeir kynna sér rökstuðning þeirra og fordæma ekki einhliða annan aðilann.

Ísrael er búið að berjast í nær 100 ár fyrir tilveru sinni, gegn ógurlegu ofurefli. Þeir eiga alla okkar samúð skilið og allan okkar stuðning.

Þar utan, eigum við auðvitað að horfa til hagsmuna Arabanna. Það er ekki sjálfgefið að flytja þurfi þá til heimkynna sinna við Rauðahafið. Hugsanlega má finna aðra lausn, en þá verða menn að nálgast vandamálið á allt annan hátt en Imba gerir.

[Björn Heiðdal, 17.1.2009 kl. 16:40]

Ég hugsa nú að 83% íbúa Ísraels vilji líka frið og varla eru aðferðir Ísraels milljónfalt verri eins og Hákon segir.  En það eru fleiri Palenstínumenn drepnir í þessum átökum og samkvæmt nýjust tölum er munurinn 100 faldur.  Samkvæmt tölfræðinni eru Ísraelar því hundrað sinnum duglegri að drepa fólk en Hamas samtökin. 

Svo þætti mér vænt um að Sveinn kæmi til dyrana eins og hann er klæddur.  Láta vera að gera sér upp samúð með deyjandi fólki á Gasa og segja svo "Ísraelar eru ekki hafnir yfir gagnrýni en fullkomið skilningsleysi á aðstæðum þeirra er til óþurftar. "

Það er sem sagt í lagi að skjóta þessi börn vegna Hamas?  Með sömu rökum getur þú réttlætt sjálfsmorðsárásir Hamas á strætisvagna fulla af fólki!  Þarna voru Ísraelskir hermenn og líka nokkrar gamlar konur og ömmubörnin þeirra.  bara æ, æ, svona eru stríð. 

[Guðjón Sigþór Jensson, 17.1.2009 kl. 17:45]

Hér er um mjög flókið mál að ræða, margt af upplýsingunum hefur verið hnikað til hvað sannleikann og staðreyndir varðar. Þar sem tveir aðilar og jafnvel fleiri deila er ekki auðvelt að meta stöðu ála.

Við verðum að gera okkur grein fyrir því að þar sem hernaðarátök eiga sér stað er líka gróskumikil einhliða og hlutdræg upplýsingastarfsemi þar sem farið er frjálslega um það sem máli kann að skipta.

Það verður hins vegar að segjast eins og er, að yfirvöld Ísraela eða Gyðinga hafa ekki sérlega góðan málstað að verja þegar um er að ræða þessar blóðugu fórnir með hernaðarbrambolti. Sennilega hefðu þeir náð meiri og betri árangri með friðsamlegri aðferðum. Það kann að vera mikill árangur að nánast lama andstæðing sinn en besta aðferðin að sigra andstæðing sinn er að friðmælast við hann!

Hernaðarsinnanir í Ísrael hafa því mður ekki áttað sig á þessu. Afleiðingin er hreint skelfileg:

Lengi vel var megin atvinnuvegur í Ísrael ferðaþjónusta. Mjög margir kristnir menn hvaðan æva úr heiminum vildu gjarnan heimsækja þetta athyglisverða land. Nú er þar ekki sérlega friðsamlegt og miklu hefur verið spillt. Hverjir skyldu það vera sem hafa haft mest gagn af því?

Ísraelar eða Gyðingar? Varla.

Palestínumenn? Þaðan af síður.

Ætli þeir sem selja vopn af ýmsu tagi hvort sem er til Ísraela/Gyðinga eða Palestínumanna hafi ekki haft mesta gagnið af þessu brambolti og endalausu mannvígum og tortryggni?

Mosi

[Hjálmtýr V Heiðdal, 17.1.2009 kl. 18:13]

Það er furðulegt að til sé fólk sem er talið vera í lagi svona dags dagleg, stundar sína vinnu og umgengst sína nánustu að alúð, skuli geta rætt þessi mál með jafn ískyggilega vitlausum hætti og hér birtist hjá sumum. Ísraelar hersitja aðra þjóð, þeir stela landi þeirra og myrða þá þusundum saman. Svo snýst þetta fólk til varna - líkt og allir myndu gera í sömu sporum.

Það verður þá allt í einu aðalglæpurinn!??

Til að réttlæta glæpina þá er auðvitað búin til margslungin lygasaga.

Ég spyr yfirleitt þá sem styðja Ísraelsku glæponana hvernig þeir útskýri búsetu 450,000 Ísrael á landi sem aðrir eiga. Svarið við þeirri spurningu skýrir oft að fólkið sem styður Ísrael er haldið þeirri blindu að til sé einhver réttur til þess að stela landi - ýmist með einhverri sögulegri skírskotun sem hefur ekkert gildi, eða þá að þeir samþykka þessa meðferð á fólki sem býr langt í burtu. Ef þessir stuðningsmenn Ísraelsku síonistanna stæðu sjálfir frammi fyrir því að einhver tekur land þeirra og brýtur niður hús þeirra snérust þeir væntanlega til varna sér og sínum. Eða hvað? Ef það væri herlið frá Ísrael þá væri það í lagi?

[Vilhjálmur Örn Vilhjálmsson, 18.1.2009 kl. 08:44]

Þakka þér fyrir góðan pistil. Ýmislegt sem ég hef ekki séð áður.

Þetta eru auðvitað allt saman "lygar og áróður" ef þú spyrð frændurna Heiðdal og þá grímuklæddu.

Vissir þú, að mikill hluti þess fólk sem er með hatur í garð Ísraels og gyðinga, er komið af fólki sem var í Þjóðernissinnaflokki Íslands (nasistaflokknum), eða eiga þýska og dansk/þýska forfeður? Einhvern tíma væri nú gaman að rannsaka það.

Stór hluti er líka vinstri fólk sem er leitt yfir örlögum gömlu hatursvélarinnar. Þeim þykir Hamas góður kostur, því þeir hata sömu aðilana og gamla apparatið sem hrundi.

[jón jón (IP-tala skráð) 18.1.2009 kl. 15:51]

Hvet ykkur öll sérstaklega þig Sveinn  til að horfa á heimildamynd sem heitir
Peace, Propaganda & the Promised Land og hefur verið sýnd á þessum kvikmyndahátiðum Film Festivals
Official Selection, 2008 One World Berlin Film Festival
Official Selection, 2008 PSBT International Film Festival and Forum
Official Selection, 2008 Adelaide Festival of Arts
Official Selection, 2004 Seattle Arab & Iranian Film Festival
Official Selection, 2004 Copenhagen International Documentary Film Festival
Official Selection, 2004 Tempo Documentary Film Festivalþar er farið hlutlaust yfir þetta hvernig fjölmiðlar segja frá stríðinnu eftir því hvort þeir séu í Bretlandi eða USA. hægt er að ná í hana með torrent á http://thepiratebay.org/torrent/4646743/Peace__Propaganda_And_The_Promised_Land_%5BAVI%5D
 

[Sveinn Tryggvason, 18.1.2009 kl. 23:30]

Þakka þeim sem kunnu að meta innlegg mitt.  Færslan er fyrst og fremst ætluð þeim meirihluta fólks sem er forviða og sorgmætt yfir þeim hörmungum sem almennir borgarar verða fyrir vegna þessa stríðs. Fólks sem hefur kannski ekki fengið að heyra þessa hlið málsins. 

Ég geri mér litla von um að ná til fordómafullra manna sem forðast rök en halda sig við hatursfulla orðræðu.

jón jón: Þakka þér fyrir ábendinguna um heimildarmyndina. Ég horfa á hana við tækifæri - via Google Video (nota ekki sjóræningjadót þar sem ég hef ekki áhuga á að smitast af vírusum og verða hluti af einhverju botnet) . Ég sé að Wikipedia hefur m.a. þetta að segja um hemildarmyndinamyndina:

A review in the New York Times by Ned Martel found that the film "largely ignores Palestinian leadership, which has surely played a part in the conflict’s broken vows and broken hearts. And such a lack of dispassion weakens the one-sided film’s bold and detailed argument". 

Skv. þessu virðast höfundar myndarinnar hafa notað propaganda til að gagnrýna propaganda :)  

[Gunnar Th. Gunnarsson, 19.1.2009 kl. 00:25]

Það er merkilegt að vera talinn stuðningsmaður Ísraela fyrir að benda ó ájafnvægið í umræðunni um þessi mál. Það er nú ekki oft sem ég er sammála Mosa, en hann nálgast þetta á nokkuð hógværan hátt.

Hjálmtýr aftur á móti er með gamalkunna frasa frá hörðum vinstrisinnum og það er ekkert nýtt

[Guðmundur I Þorvaldsson (IP-tala skráð) 21.1.2009 kl. 16:18]

Get ég skrifað athugasemdir án þess að vera skráður notandi?

[Ólafur Jóhannsson, 24.1.2009 kl. 13:11]

Þakka þér Sveinn fyrir athyglisverða og málefnalega grein þína,

Til varnar Ísrael.

Í stefnuskrá félagsins Zíon, vinir Ísrael, segir: Að vera vinur Ísrael þýðir ekki að vera óvinur annarra. Ég er nýkominn frá Ísrael og hef fylgst með þessum voðaatburðum á Gaza.

S.l.17 ár hef ég starfað að miklum hluta hvers árs sem leiðsögumaður í Ísrael. Vegna starfs míns á ég marga vini meðal Palestínu/araba. Það sem vakti athygli mína í þessari ferð, var hve margir palestínumenn óskuðu þess að Ísrael myndu vinna sigur á Hamas, sem þeir óttast meira en Ísraelska varnarliðið. Að vísu eru þeir hræddir við að segja slíkt opinberlega, af ótta við hefnd Hamas, sem eru hryðjuverkasamtök og hefndaraðgerðir þeirra eru ógnvæginlegar.

Ég hef í mörg ár séð afleiðingar þeirra á götum Jerúsalemsborgar og veitingahúsum, sem ekki er hægt að hér.

Þú segir: Ljóst að Ísraelsmenn hafa þurft frá stofnun ríkisins þurft að verja sig fyrir árásum frá nágrönnum sínum.

Þetta er sannleikur. Ég sló inná orðið árásum og fékk þar fræðlilega og sanna frétt sem er á Wikipedia.org, 1948-Arab-Israel war. Þakka þér að vekja athygli á þessu og þakka þér aftur fyrir að þora að koma fram með þessa vel skrifuðu grein.

Shalom kveðja frá Zíon.
olijoe

[Guðmundur Ingi Þorvaldsson, 29.1.2009 kl. 19:31]

Sæll Sveinn gamli vinur, ég er búinn að vera veikur heima í dag og ákvað að kynna mér það um þessi mál sem ég vissi ekki og skrifa smá. Með fullri vinsemd 

Já, það er ekki að ráðast á garðinn þar sem hann er lægstur að blanda sér í umræðuna um deiluna um Palestínu. En ég hvet alla til að kynna sér söguna um þetta svæði vel áður en þeir dæma ástandið eins og það er í dag. Það er auðveldara en margur heldur, þökk sé hinu stórkostlega vefriti wikipedia. Farið þangað og sláið in Palestine. Lesið svo allar tengigreinar sem þið komist yfir.  Það eina sem ber að hafa í huga að wikipedia er ekki heilagur sannleikur um neitt. Hún er skrifuð af venjulegu fólki eins og mér og þér, betra er að lesa greinar sem vitnað er í á henni.

Hér að framan er margt gott sagt og eins og gengur í bloggheimum er líka talsvert af ómálefnalegum reiðiköstum, og ekki að undra kannski, þetta stríð er eins og önnur, ógeðfellt.

Ég bý sem stendur í London og hef reynt að kynna mér þessi mál eins og ég get, maður getur eiginlega ekki annað, ég er með bæði Aröbum og Gyðingum í bekk og þessi mál eru afar fyrirferðamikil hér.

Til að mynda hef ég farið á fundi og fyrirlestra hjá þessum félagsskap hér.

Not in our name http://www.nion.ca/

Þetta er félagsskapur gyðinga, stofnaður að gyðingum sem lifðu af veru í fangabúðum nasista í seinni heimstyrjöldinni. Þeir halda því fram að það sem stjórnvöld í Ísrael séu að gera núna á hlut Palestínu-Araba sé af nákvæmlega það sama og Nasistar gerðu við gyðinga. Á þeim fyrirlestri sem ég sótti hjá þeim var verið að bera saman Gyðinga-Gettóið í Varsjá og Gaza. Eini sjáanlegi munurinn er nálægðin við Egypta, sem hafa stundum opnað landamæri sín yfir til Gaza þegar allt hefur um þrotið og það að “tæknilega” eru leiðir út fyrir Palestínumenn, gegnum varðhlið Ísraelsmanna. Skilyrðin fyrir inn og útgöngu eru hins vegar ekki í neinum tengslum við neitt mannlegt.

Ég tók þátt í þessum mótmælum:

http://www.indymedia.org.uk/en/2009/01/418382.html

Ég hef verið á fundi með þessu liði:

http://www.worldrevolution.org.uk/index.php?id=158,0,0,1,0,0

Og ég hef líka farið á fundi í skólanum mínum þar sem allir aðilar hafa fengið að tjá sig um málin, og ég verð að segja, að jafn mikið og mig langar að vera hlutlaus, þá hafa talsmenn Ísraels komið langverst út úr þeim umræðum. Þeir enda alltaf á sínu síðasta haldreipi til réttlætingar gjörðum sínum; Biblíunni.

Ég þekki Svein, hann er góður drengur og ég veit að honum gengur gott eitt til með skrifum sínum og leitt að menn skuli vera að ráðast á hans persónu fyrir þau, það er algjör barnaskapur.

Þegar ég les um sögu svæðisins er finnst mér ljóst að það getur ekki á nokkurn hátt talist eign Ísraelsmanna frekar en annarra. Eina haldreipi þess er loforð guðs Ísraelsmanna um fyrirheitna landið, sem er nokkurn vegin þar sem Palestína/Ísrael er núna, það fer svolítið eftir því hver túlkar, sumir vilja meina að Líbanon sé hluti af fyrirheitnalandinu, sumir að hluti af Egyptalandi, allt að Níl, sumir að hluti af Jórdaníu eigi að teljast með. 

... Reyndar finnst mér alltaf svolítið skrítið að það virðist oft gleymast að meira að segja samkvæmt gamla testamentinu eru gyðingar og palestínumenn bræður. Abraham gat Ísmael fyrst utan hjónabands með konu að nafni Hagar og frá honum eiga arabar á svæðinu að vera komnir. Síðan gat hann hann Ísak með Söru og frá honum eiga gyðingar að vera komnir. Fyrir mér er biblían frábær bók, full af skemmtilegum ævintýrum og tilraunum fræðimanna þess tíma til að henda reiður á veröldinni sem þeir bjuggu í, en hvað sem mér eða öðrum finnst um það, þá hefur það verið staðfest á síðustu árum með nýjum uppgötvunum í erfðafræði að Palestínu- arabar og gyðingar eru náskyldir, það finnast erfðaefni í gyðingum sem einnig finnast í evrópubúum en ekki í palestínumönnum og það finnast erfðaefni í palestínumönnum sem finnast í aröbum en ekki í gyðingum, að örðu og langstærstu leiti eru erfðaefni þeirra eins. Um þetta er auðvelt að fræðast á netinu.  Þannig að sama hvort menn trúa á vísindi, biblíuna eða eru opnir fyrir hvorutveggja er þetta staðreynd. Mér finnst því alltaf skondið að verið sé að gera svona stórkostlega upp á milli afkomenda Abrahams og raunar finnst mér afar erfitt að réttlæta yfirgang okkar vesturlandabúa um allan heim í skjóli þess að okkar trúarbrögð séu öðrum æðri. Nýlendustefnan og krossferðirnar og allt þar á milli eru ljót saga.

Heimildir um veru Palestínumanna á þessu svæði eru aldagamlar og litlu yngri en heimildir um veru gyðinga þarna. Að fara þarna fram með offorsi með sagnfræðilegan rétt gyðinga á landsvæðinu er því hæpið. Hvað þá í ljósi einhverra trúarbragða. Værum við þá ekki líka komin á helvíti hálan ís, með til dæmis rétt Indjánana í Ameríku? Eða jafnvel rétt Íra á Íslandi?

Palestínumenn og Ísraelar hafa búið saman á þessu svæði frá örófi alda og stríð milli þeirra í raun fátíð fyrr en eftir stofnun Ísraelsríkis 1948. Hins vegar hafa sjaldan liðið meira en 100-200 ár milli þess sem þetta svæði hefur skipt um drottnara, Rómverja, Persa, Ottoman veldið og svo mætti lengi telja. Um allt þetta má lesa á wikipedia. 

Eftir að Ottoman veldið líður undir lok eftir fyrri heimstyrjöld og fram að stofnun Ísraelsríkis réðu Bretar því landsvæði sem nú er Palestína. Reyndar talvert stærra svæði því eins og vesturvelda var háttur skiptu Bretar og Frakkar þessu svæði upp með reglustriku nánast. En breska Palestína leit svona út um 1923.

http://en.wikipedia.org/wiki/File:BritishMandatePalestine1920.png

Árið 1917 gaf Arthur Balfour, fyrrum forsætisráðherra Breta og þáverandi sendiherra út yfirlýsingu svohljóðandi um stofnun ríkis fyrir gyðinga:

 "view with favour the establishment in Palestine of a national home for the Jewish people" with the understanding that "nothing shall be done which may prejudice the civil and religious rights of existing non-Jewish communities in Palestine, or the rights and political status enjoyed by Jews in any other country."

Hér er svo kortið af Palestínu þar sem sýnd er tillaga Sameinuðu þjóðanna af skiptingu landsvæðisins milli Gyðinga og Araba frá árinu 1947

http://en.wikipedia.org/wiki/File:UN_Partition_Plan_Palestine.png

Þetta er talsvert frábrugðis skiptingunni eins og hún er í dag ekki satt?

http://upload.wikimedia.org/wikipedia/commons/8/8c/Southeast_mediterranean_annotated_geography.jpg

Og nota bene, Ísrael innlimaði Gólan-hæðir í ríki sitt árið 1981 á þeim forsendum að tryggja landamæri sín og vernda íbúa Ísraels. Þetta gerðu þeir í trássi við alþjóðasamfélagið sem hefur enn ekki viðurkennt að Gólan hæðir tilheyri Ísrael, en eins og oft áður og síðan, aðhöfumst við ekkert gegn Ísraelsmönnum.

Sameinuðu þjóðirnar skilgreina þá Palestínumenn sem misstu land sitt, voru fluttir um set eða fluttu sig um set vegna þrýstings frá Ísrelsmönnum á árunum 1946-1948, sem flóttamenn, jafnvel þótt þeir búi ekki eða hafi aldrei búið í flóttamannabúðum. 4. Milljónir Palestínumanna falla í þann flokk. Það eru næstum allir Palestínu-Arabar (talið er að um 1,4 milljónir búi á Gaza svæðinu, 2,4 á Vesturbakkanum og um 1,3 milljónir í Ísrael).

Það sem í raun gerðist á þessum tíma var típískur vestrænn yfirgangur. Í ljósi trúar okkar á hinn eina rétta guð og með biblíuna sem kyndil færðum við heila þjóð til og frá, tókum þau lönd sem okkur fannst rétt og settum aröbum afarkosti, að færa sig, gerast ísraelskir ríkiborgarar ellegar vera færðir.  Af kynningu minni af þessu öllu fæ ég hvergi séð að Arabar hafi, fram að þessu haft neitt sérstaklega á móti gyðingum, meira en fólki af öðrum kynþáttum, þeir höfðu hins vegar mikið á móti stofnun Ísraelsríkis og því hvernig að því var staðið. Í hönd fóru nokkur blóðug stríð sem hægt er að lesa allt um á wikipedia með lítilli fyrirhöfn.
 
Þá erum við komin í nútíman. Mér finnst bara erfitt að ræða hann án þess að skoða uppruna málsins. Síðan að Ísraelsríki var stofnað hefur ýmislegt gerst, flest miður fallegt. Báðir aðilar hafa gert sig seka um ljóta hluti sem hafa komið í veg fyrir varanlegan frið. Þannig var það til að mynda að eftir sex daga stríðið komust Egyptar og Ísraelar að samkomulagi um að Ísraelar skiluðu Egyptum aftur Sínaískaga sem þeir unnu af þeim í stríðinu gegn því að Egyptar, fyrstir Arabaþjóða að ég best fæ munað, viðurkenndu Ísraelsríki. Þriðju hluti samkomulagsins var að Ísraelsmenn viðurkenndu ríki Palestínu-Araba. Fyrstu tvö atriðin gengu eftir en Ísraelsmenn gengu á bak orða sinna með þriðja atriðið.

Margir voru og eru enn reiðir Yasser Arafat fyrir það sem hann gerði í kringum Camp David viðræðurnar um  árið 2000. Þetta er raunar eina alvöru tilboð Ísraelsmanna um stofnun ríkis Palestínumanna. Hvort það er sanngjarn er illt að spá, ég er ekki viss um að ég myndi ganga að því, ekki nema kannski sem neyðartilraun til að koma á friði. Friður held reyndar að hefði aldrei komist á með þessu, til þess eru of sterk öfgasamtök í röðum beggja deiluaðila.

Þetta er að finna á wikipedia

Arafat continued negotiations with Netanyahu's successor, Ehud Barak, at the Camp David Summit in July 2000. Due partly to his own politics (Barak was from the leftist Labor Party, whereas Netanyahu was from the rightist Likud Party) and partly due to insistence for compromise by President Clinton, Barak offered Arafat a Palestinian state in 73% of the West Bank and all of the Gaza Strip. The Palestinian percentage of sovereignty would extend to 91% (94% excluding Jerusalem) over a ten to twenty-five year period. In exchange for the withheld areas of the West Bank where the main Israeli settlement blocks were situated, Barak offered the equivalent area in the Israeli Negev desert. Also included in the offer were the return of a small number of refugees and compensation for those not allowed to return. Arafat rejected Barak's offer and refused to make an immediate counter-offer.[61]He stated to President Clinton that, "the Arab leader who would surrender Jerusalem is not born yet".[76] The move was criticized even by a member of his own negotiating team and cabinet, Nabil Amr.

Finnst ykkur þetta sanngjarnt?
Haldiði að Hamas-liðar hefði hætt árásum ef þetta hefði gengið í gegn?
Haldiði að heitir Zionistar og öfgafulli hægri armur Likud bandalagsins hefði sætt sig við þetta? Sami armurinn og réð Yitshak Rabin af dögum 1995 fyrir að vera að semja við Palestínumenn?

Allt það sem hér að framan er skrifað er eingöngu skrifað til að hvetja fólk til að kynna sér ástandið vel og kyrfilega áður en það fer að dæma ástandið eins og það er í dag. Það á sér langa, erfiða og blóðuga forsögu sem sér svo sannarlega ekki fyrir endann á. Ég mun aldrei mæla aðferðum Hamas bót, en hvet fólk til að vera á varðbergi fyrir einföldum áróðursmeðulum eins og þessu myndbandi sem Sveinn sýnir okkur af sprengjutengingu Hamas við skóla. Svona nokkuð getur hver sem er sett upp með vír, sendibílalyftustjórntæki og heimiliskameru. Reynum eins og við getum að láta ekki blekkjast af áróðri. Ég sé ekki af hverju Hamas ætti að leggja sprengjuvír afturfyrir sanpoka á varðstöð Ísraelsmanna, í gegnum nýsprengt gat (sem hermennirnir segja stoltir frá að þeir hafi sjálfir sprengt) og síðan er okkur aldrei sýnd nein sprengja. Hamas eru útsmognari en þetta.

Fyrir mér er ástandið á landsvæðinu milli Miðjarðarhafs og árinnar Jordan algjörlega óásættanlegt. Hvað sem því líður hver sprengdi hvern fyrst og hver réðst á hvern fyrst þá eru aðferðir Ísralesmanna skelfilegar. Þeir einfaldlega girða fólk af, svelta það, pína og sprengja, síðan spyrja þeir “ætlarðu að vera góður”? Og rétt eins og með innlimun Gólan-Hæða er þetta allt í þeim göfuga tilgangi að verja þegna sína fyrir árásum. Ef þú króar af villidýr, særir það svöðusári og ert svo hneykslaður á að það vilji ekki láta klappa sér … dæmir það síðan ósamvinnuþýtt og hættulegt er nokkuð ljóst að þú ert annað hvort nautheimskur eða eitthvað annað vakir fyrir þér.

Langstærstur hluti alþýðunnar í girðingum Palestínumanna og löndum Ísraelsmanna vill ekkert frekar en frið, en alveg eins og skæruliðar Hamas eru öfgamenn sem hafa lýst því yfir að þeir muni aldrei viðurkenna Ísrael og aldrei hætta fyrr en allt svæðið mill Miðjarðarhafs og Jórdaníu verði Palestínskt yfirráðasvæði, eru líka öfgasamtök í Ísrael sem ætla sér ekki að hætta fyrr en markmiðinu um Stór-Ísrael er náð. Frá stofnun Likud bandalagsins árið 1973 hafa þeir hvatt Ísraelsmenn til að setjast að á landssvæðum Palestínumanna. Frá því að “landamærin” voru sett eftir sex daga stríðið, stundum kallað Græna línan, hafa Ísraelsmenn stöðugt verið að ásælast og taka landsvæði sem þeir eiga ekkert tilkall til nema samkvæmt einhverri skilgreiningu á Stór-Ísrael.

Hér er besta kortið sem ég gat fundið af þessu, en enn og aftur hvet ég alla til að leita sér upplýsinga.

http://en.wikipedia.org/wiki/File:West_Bank_%26_Gaza_Map_2007_(Settlements).png

Það sem talið er að Ísraelsmenn vilji í raun semja um er að á Gaza verði til Palestínskt ríki. Þar hafa Palestínumenn búið frá örófi alda og meira að segja Ísraelskir öfgamenn gera ekki sérstaklega tilkall til þess svæðis. Meira að segja Ariel Sharon, Likud maður stóð fyrir brottflutningi landnema á því svæði. Hins vegar vilja Ísraelsmenn fá Vesturbakkann. Þeir eru búnir að hreiðra þar um sig á víð og dreif, skipta svæðinu upp í fjögur svæði sem þeir stjórna umferð á milli. Þeir hafa sett upp girðingar og varðstöðvar til varnar landnemum.

http://upload.wikimedia.org/wikipedia/commons/d/d8/Westbankjan06.jpg

Enn og aftur vil ég taka það fram að ég er ekki að mæla hryðjuverkum Hamas eða annarra skæruliða/stjórnmálasamtaka bót, en það hlýtur að vera ljóst að Ísraelar hafa farið fram með frekju og á stundum offorsi á þessu svæði, vel bakkaðir upp af Bandaríkjamönnum og öðrum vesturveldum. Hernaðaraðstoð Bandaríkjanna við Ísrael er gígantísk, áætlað er að hún muni nema 30 milljörðum Bandaríkjadala næstu tíu árin. Einhversstaðar las um daginn að hver skattborgari í Ameríku borgaði 10.000 kr á ári í styrk til Ísraelsríkis. Af því fara um 4000 kr í efnahagsaðstoð og um 6000 kr í hernaðaraðstoð. Ísraelsmenn eru líka kjarnorkuríki og eru í raun öflug varðstöð Bandaríkjanna í miðjum arabaheimi.

Myndum við Íslendingar semja um svona nokkuð ef þetta væri staðan hér. Ef það væri til að mynda búið að ákveða það í alþjóðasamfélaginu að heimurinn hefði farið illa með Kúrda sem hafa ekki átt sitt eigið ríki lengi og verið ofsóttir hvar sem þeir búa? Í Tyrklandi og Írak? Þeir hefðu í upphafi fengið Eyjafjarðarsýslu, Suðurlandsundirlendið og Borgarfjörðinn, en smámsaman hefðu þeir dreyft úr sér og nú væri svo komið að það væri búið að girða af Vestfirði milli Gilsfjarðar og Steingrímsfjarðar og okkur settir þeir afarkostir að flytjast þangað öll og haga okkur vel, annars værum við bara sprengd og svelt til að vernda Kúrdíska borgara landsins?

Ég veit að þetta dæmi er ekki fullkomið, en að mörgu leiti ekki fráleitt.

En það magnaða er að ég held að stór hluti Palenstísku þjóðarinnar væri alveg til svona samkomulag, fyrir varanlegan frið, svo aðframkomin er hún. Að þeir sem vildu gætu gerst Ísraelskir ríkisborgarar og búið innan landamæra þess (sem um 1,3 milljónir þeirra hafa nú þegar gert) eða að öðrum kosti flutt á Gaza (ekki innan þeirrar gyrðingar sem nú er umhverfis Gaza heldur allavega þess svæðis sem tilheyrði Gaza 1967)

En hún veit sem er að þessi lausn mun aldrei skapa frið, Hamas og aðrir öfgahópar munu aldrei sætta sig við ástandið á Vesturbakkanum og hvernig að stofnun og útþenslu Ísraelsríkis hefur verið staðið. Eins er ljóst að öfgafullir hægrimenn í Ísrael vilja eiga Gólan-hæðir, Vesturbakkann allan og renna meira að segja hýru auga til Líbanon og vilja bara alls ekkert Palestínskt ríki. Það er því rétt hjá Sveini, málin eru í öngstræti.

En ég fordæmi aðferðir Ísraelsríkis við að gyrða af Palestínumenn og koma fram við þá ekki ósvipað og Nasistar komu fram við þá sjálfa í gettóum hér og þar í seinni heimstyrjöldinni. Það er þeim alveg ljóst að sú aðferð mun aldrei skila þeim friði eða að Palestínumenn láti af hryðjuverkum. Það vakir annað og meira fyrir þeim en það. Það er tómt mál um að tala að ætla fólki að hugsa “rökrétt” frá Skandinavískum bæjardyrum séð, undir þessum kringumstæðum. Og það sem gerist innan veggja fangelsa er álíka eðlilegt og það sem gerist í allt of litlum músmörgum músabúrum í tilraunastofum. Það er ekkert eðlilegt við fangelsi eða fangabúðir og tómt mál að tala um “eðlilega Skandinavíska rökhugsun” undir þeim formerkjum. Það er ósanngjarnt að dæma fólk sem er svipt öllum grundvallarmannréttindum, er pínt og svelt, yfirheyrt, einangrað og allt gert til að ýfa upp innbyrðis átök og tortryggni og ætla því að sýna sanngirni og yfirvegun.

Ég veit ekki alveg hvað ég myndi gera ef ættaróðalið mitt hefði verið tekið af fjölskyldunni minni og okkur boðið að fá skika norður á Hornströndum í staðinn. Ef að við hefðum verið fangelsuð, flutt nauðug og sum okkar drepin fyrir að mótmæla eða jafnvel snúast til varnar.

Mér finnst í raun hugmyndin hans Arthurs Balfour fín, og raunar voru meira að segja ýmsir Arabískir forystumenn því afar hlyntir að gyðingar kæmu til Palestínu og keyptu sér land og byggju þar.

"view with favour the establishment in Palestine of a national home for the Jewish people" with the understanding that "nothing shall be done which may prejudice the civil and religious rights of existing non-Jewish communities in Palestine, or the rights and political status enjoyed by Jews in any other country."

Það er hins vegar morgunljóst að Ísraelsmenn hafa virt að vettugi miðhluta þessarar yfirlýsingar.

Friður sé með okkur öllum

Guðmundur Ingi 

[Sveinn Tryggvason, 31.1.2009 kl. 17:33]

Þakka þer fyrir athugasemdina, Guðmundur Ingi. Hún er að mestu leiti málefnaleg og mikið af góðum upplýsingum og athugasemdum sem ég get sumar hverjar tekið undir. Þú hlýtur að setja einhverskonar með með þessari athugasemd - því öllu lengri verða þær alla vega ekki :)

Takk aftur - sendi góða kveðju til London.

[Guðmundur Ingi Þorvaldsson, 4.2.2009 kl. 09:57]

Alltaf gaman að setja met :-) Samt er maður bara rétt að skrapa yfirborðið á þessari mjög svo flóknu deilu. Margt af því sem fólk, búsett hér, burtflúið af svæðinu, hefur sagt mér af ástndinu þarna, lét ég kyrrt liggja. Ég reyndi að halda mig við eitthvað bókfast. Þær sögur eru samt svakalegastar og sýna manni enn og aftur í hverskonar skepnur venjulegt fólk getur breyst í stríði.